O Alcalde de Gondomar non convoca á oposición da xuntanza coa veciñanza de Prado por “problemas co servidor e os correos electrónicos”
No día de hoxe, recibidos unha comunicación por parte da xefa de gabinete de Don Paco Ferreira para informarnos que, por motivos descoñecidos, non recibimos a convocatoria da xuntanza da Corporación Municipal coa veciñanza de Prado para tratar a situación do local social sobre a que pesa orde de derrubamento.
Velaí a inaudita mensaxe que chegou ao correo electrónico do noso voceiro, Antonio Araujo.
Dende Manifesto Miñor sabemos que, ultimamente, os correos electrónicos e os servidores fallan moito. Lamentamos que na casa do Concello non haxa unha cabina telefónica, como as de toda a vida, para chamar a oposición cando se trata de asuntos de tanta importancia para a veciñanza. Quizais sería conveniente recuperar a figura do alguacil, que nos convocara como se fixo sempre, xa que tampouco nos mandou a policía local co recado.
Aparte da retranca, esta actitude so vén confirmar que o goberno municipal trata de apartar á oposición de todas as cuestións relevantes do Concello e poder, así, ocultar información á mantenta. Esta mensaxe soamente contén excusas de quen mantén deliberadamente unha xestión opaca e pouco clara. Falta transparencia.
Gondomar, 10 de setembro de 2021.
Manifesto Miñor