Manifesto Miñor presenta unha moción para solicitar que o Goberno do Estado denegue fondos europeos para subvencionar o proxecto de ALTRI en Palas de Rei
Gondomar, 25 de marzo de 2025.- Galicia é un País pequeno en extensión pero con moitos e valiosísimos ecosistemas, iso si, moi humanizados dende que o ser humano decidiu vivir aquí. Con todo, malia esa intensidade na ocupación do territorio e á modificación do mesmo dando lugar á aparición de espazos singulares en beleza e con características propias duna cultura tamén milenaria, nunca se chegara ao grao de destrución e agresión que nos últimos anos estamos padecendo: minaría a ceo aberto, encoros desproporcionados, unha eucaliptización salvaxe que fai desaparecer as terras agrarias e a floresta autóctona, por non falar da espada de Damocles que supoñen as ducias de parques eólicos que pretende construír tanto nos nosos montes como no mar de Galicia. E agora, por se todo isto fose pouco veñen cun proxecto industrial, inicialmente disfrazado de verde-sustentable-criador de postos de traballo, cando en realidade se trata dunha macro planta para producir pasta de celulosa. Cremos que pensada inicialmente para substituír a ENCE cando se daba por feito a súa desaparición, cousa non vai ser, é dicir, Galicia terá que producir eucaliptos para estas dúas aberracións industriais. Alguén dirá que a implantación de ALTRI en Palas de Rei queda a máis de 150km de Gondomar e polo tanto non nos vai afectar. Non é certo, ALTRI é unha bomba de reloxería contaminante chantada no corazón da Galicia cuxos efectos nocivos van afectarlle a todo o País. Unha vez máis converten a Galicia en territorio de sacrificio tratándonos coma unha colonia. Empresas de enclave que veñen, rapinan os recurso, estragan e contaminan o territorio, e cando acaban levantan bandeira e vanse a outro lado. Por certo, Portugal non quixo este proxecto comezando por acoutar a superficie para eucaliptos.
Velaí algunhas das razóns que o movemento social en contra deste proxecto dan: Este proxecto afectará gravemente ao patrimonio cultural e natural da comarca da Ulloa e limítrofes. Así mesmo afectará ás augas e á atmosfera, ao envelenar con elevadas cantidade de compostos químicos o río Ulla e emitir gases contaminantes que por acumulación estragarían cultivos e afectarían directamente a saúde das persoas e da terra. A implantación desta fábrica repercutirá dun xeito negativo sobre o tecido socioeconómico da zona, sumando desvalorización das terras e consolidando o despoboamento. Preténdese instalar dúas factorías: unha para elaborar 400.000 T/ano de CELULOSA solúbel, e outra que transformaría a celulosa solúbel en fibra téxtil LYOCELL, unhas 200.000 T/ano. O proxecto ocupará 360 ha. destruíndo hábitats de altísimo valor ecolóxico incluídos na proposta de ampliación da Rede Natura e con poboacións de especies protexidas únicas en Galicia. A brutal eucaliptización será a nova paisaxe da zona centro de Galicia xa que se precisan unhas 60.000 ha de eucalipto (4000 ha/ano x 15 anos que tarda de promedio en medrar). Estas árbores consumen unha elevada cantidade de auga (20 veces máis que carballos ou castiñeiros) e son especies pirófitas, razón suficiente para a prohibición das novas plantacións en Portugal despois dos gravísimos incendios de 2017 onde perderon a vida decenas de persoas. A solicitude de concesión de augas é por 75 anos para una captación de auga de 640 l/seg (máis de 46 millóns de litros diarios). Sendo o consumo promedio de auga en Galicia de 130 1/habitante/dia, este complexo industrial empregará o equivalente a 353.850 habitantes/día, é dicir, máis do que consumen os habitantes da provincia de Lugo nun día. Segundo o proxecto máis do 65% da auga usada volverá ao río tratada con químicos, é dicir contaminada, deteriorando aínda mais a calidade da auga do Río Ulla, chegando esta contaminación á Ría de Arousa, xa de por si con problemas de contaminación e co que isto significaría para un sector estratéxico como é o do mexillón, a pesca de baixura, etc. Asemade, o Rio Ulla abastece de auga para beber aos concellos de Teo, Padrón, Dodro, Rianxo, Boiro, A Pobra, Ribeira, Valga, Pontecesures, Catoira e Vilagarcía de Arousa, un total de 146.000 galeg@s podendo provocar un grave problema de saúde.
Resulta evidente que estamos diante dun gravísimo problema de País que como sociedade temos que lle dar unha resposta clara e contundente. A día de hoxe os pronunciamentos da maioría das organizacións políticas, sindicais, agrarias, sociais e, obviamente ecoloxistas, son claramente contrarias a este proxecto industrial.
Estamos convencidxs que, por exemplo, a eucaliptización non vai quedar cinguida á zona de influencia de ALTRI, senón que nos vai invadir toda Galicia se deixar rastro de arborado autóctono, que imos perder recursos de moita calidade e de proximidade, e polo tanto soberanía alimentar no momento en que as terras se acidifiquen, o aire se contamine ou a pesca de baixura e os mexillóns das nosa rías deixen de chegar ás prazas de abastos. É dicir, seremos máis pobres e dependentes como País e con peor saúde como persoas.
É por isto que dende Manifesto Miñor consideramos que procede que a Corporación Municipal de Gondomar se pronuncie ao respecto deste proxecto que ALTRI pretende implantar en Palas de Rei, polo que PROPOÑEMOS un acordo do Pleno da Corporación Municipal de Gondomar para EXIXIR do Goberno do Estado a denegación dos fondos europeos que ALTRI reclama para a súa instalación en Palas de Rei, dádo que representa un modelo industrial de carácter colonial e negativo para os interese de Galicia como País e nocivo para a saúde dos galegos e das galegas.
Manifesto Miñor
