ALTRI NON! Mina Touro – O Pino NON! Manifesto Miñor anima a participar na “Manifestación na defensa do noso mar e da nosa Terra” o vindeiro sábado n’A Pobra do Caramiñal
Val Miñor, 18 de marzo de 2025.- Galicia é un País pequeno en extensión pero con moitos e valiosísimos ecosistemas, que moitas veces permanecen grazas á teimosía do movemento social e ecoloxista galego. Con todo, non cesan as ameazas ao patrimonio medioambiental por parte dos sucesivos gobernos do Partido Popular e de iniciativas empresariais e industriais depredadoras para o entorno, polo que nunca se chegara ao grao de destrución e agresión que nos últimos anos estamos padecendo: minaría a ceo aberto, encoros desproporcionados, unha eucaliptización salvaxe que fai desaparecer as terras agrarias e a floresta autóctona, por non falar da espada de Damocles que supoñen as dúcias de parques eólicos que pretenden construír tanto nos nosos montes como no mar de Galicia. E agora, por se todo isto fose pouco, veñen cun proxecto industrial, inicialmente disfrazado de verde, sustentable e creador de postos de traballo; na realidade, trátase dunha planta para pasteira de celulosa no corazón do País, que vai destruír a comarca da Ulloa e todo o río Ulla até a ría de Arousa. O pasado venres publicábase no DOG a Declaración de Impacto Ambiental positiba do proxecto de Altri, un paso máis para o desenvolvemento da pasteira no Concello de Palas de Rei.
Pois ben, o vindeiro sábado está convocada n’A Pobra do Caramiñal unha manifestación contra Altri e contra a mina de Touro – O Pino na que debemos estar presentes todas as persoas cunha mínima conciencia medioambiental para que a Xunta vexa o rexeitamento que producen na cidadanía. Manifesto Miñor e outras candidaturas municipalistas, levamos tempos apoiando as mobilizacións contra estes dous proxectos e, como non podía ser doutra maneira, tamén imos participar da “Manifestación por terra e por mar na defensa do noso mar e da nosa terra” convocada pola Plataforma en Defensa da Ría de Arousa e apoiada pola Plataforma Veciñal mina Touro – O Pino NON e pola Plataforma Ulloa Viva que se vai celebrar o vindeiro sábado 22 de marzo, n’A Pobra do Caramiñal (saída da Estación de Autobuses).
Dende Manifesto Miñor animamos a toda a veciñanza do Val de Miñor e de todo o país a achegarse a comarca do Barbanza o vindeiro sábado e participar desta mobilización contra dous proxectos que van destruír a biodiversidade en todo o río Ulla e os modos de vida tradcionalmente asociados a pesca e ao marisqueo na ría de Arousa. Vémonos n’A Pobra do Caramiñal!