[Moción] Manifesto Miñor reclama que o Goberno municipal de Gondomar xestione máis subvencións para poñer en valor o noso patrimonio ecolóxico
Como vén sendo habitual dende o cambio de goberno provincial, antes de final de ano, a Deputación Provincial de Pontevedra vai sacar a exposición pública no BOP o anuncio para que os concellos da provincia soliciten as subvencións correspondentes para realizar proxectos que poñan en valor o patrimonio forestal e natural, paisaxístico, etc. dos nosos montes. As axudas están vinculadas á creación de parques forestais (liña 1), ou á mellora das condicións dos montes en xeral a través de proxectos xa redactados (liña 2), e que dalgún xeito tamén axuden á loita contra o lume.
Pois ben, no Plan Concellos 2018-19 da devandita deputación, o concelleiro de Manifesto Miñor, Xosé Anton Arauxo, conseguira daquela incluir nese plan a elaboración dun exhaustivo proxecto de recollida e documentación do extraordinario e único patrimonio cultural, natural, etc. co que contamos en Gondomar, coa idea de dálo a coñer e de poñelo en valor como estratexia para a súa protección. E así foi, froito das xestións realizadas viu a luz en febreiro de 2019 un magnífico volume editado polo Instituto de Estudos Miñoráns e realizado polo Arquitecto gondomarense Antonio Soliño e maquetado por Juan Chamorro, de quen tamén son as fotografías.
A idea do concellerio de turismo no pasado mandato, Xosé Antón Araúxo, era completar o devandito proxecto coa sinalización dos roteiros que se van indicando no libro, incluso coa planimetría correspondente, discripción das rutas, fotografías daqueles fitos ou elementos máis salientábeis da mesma, etc. Dese xeito, conseguiría darlle unha plasmación real e práctica ao traballo de campo e de investigación feito polos citados técnicos.
Dádo que por razóns orzamentarias e políticas non se puido completar o traballo iniciado no 2018, e para que non quede só reducido á parte teórica e de investigación (moi importantes), pero insuficientes, o Grupo Municipal de Manifesto Miñor-En Marea vai presentar unha iniciativa ao vindeiro Pleno do 23 de decembro co obxecto de que o Goberno Municipal retome de novo o proxecto incial para completalo. É dicir, para proceder á sinalización dos roteiros, acondicionamento dos mesmos, etc. dacordo o indicado no libro publicado.
En Gondomar, a 14 de decembro de 2019.
Asdo.: Antonio Araújo Quintas.
Voceiro de Manifesto Miñor – En Marea
